Blog

Enkele gedagtes uit ‘n preek gelewer deur dr Pieter Bingle op 20 November 2005 oor RSG:

Vyf saakmakende momente (sekondes) van die lewe… Sekondes is ‘n stukkie gekapte tyd uit die ewigheid.

1. Die eerste sekonde van jou tyd (Ps 139:14-16)
My eerste sekonde (al besef ek dit nog nie) kondig aan dat hoe my verdere sekondes ook al gaan verloop, dat iewers in die ontvouing van God se raadsplan ek sy instrument gaan wees.

2. Die laaste sekonde van jou tyd (1Kor 15)
Jou doodsberig. My lewe word nie begrens deur die twee historiese datums van my geboortedag en my sterfdag nie. God se raadsplan met my is nie vasgevang in die sirkeltyd van ‘n horlosie of in die uitskeurbladsye van ‘n kalender nie. Uiteindelik sal die kalenderdae van ons lewe volloop, maar nooit ooit word dit uitgeskeur uit God se ewigheidskalender nie. Daarom word ons by afsterwe nie geskiedenis nie. Jou laaste sekonde by afsterwe is dus nie dié laaste nie. Dit is maar pas die begin – begin van ewige vreugde en ewige lewe of ewige smart en ewige verlorenheid. Die beslissing en skei-ding van die weë val in die sekonde van hierdie lewe. Die teerling en lotsbeslissing word gewerp rondom die vraag: Wie is Christus in jou lewe?

3. Die laaste sekonde van dié tyd (Openbaring 20:12)
Daar kom ‘n dag dat alle horlosies sal gaan staan. Dit is wanneer die laaste sekonde van die laaste dag aanbreek en die oordeel voltrek word. Ons is elkeen ‘n skrywer wat elke dag besig is om ‘n boek te skrywe, nie met pen en ink nie, nie op papier nie. Elke dag skryf ons ons eie outobiografie, my eie lewensverhaal God se môre begin vandag. So skuif die toekoms die hede in, want wat môre en die laaste sekonde met jou gaan gebeur, word in die sekondes van vandag en elke dag beslis. Dit is die geweldige appél op ons elkeen: Dink wat jy doen. Jou lewe speel elkeda g voor God af. Die ryk genade van God is dat in die laaste sekonde van die tyd ook ‘n ander boek oopgemaak word – die Boek van die Lewe!

4. Die ewige sekondes (2 Pet 3:13)
God is met sy skepping op weg na die voleinding – op weg, nie na ‘n utopie nie, ‘n geen-plek nie, maar na ‘n eutopie, ‘n goeieplek, ‘n nuwe skepping. Die belofte van die voleinding moet die werklikheid van elke dag stimuleer en dirigeer. Die effek van die Christelike toekomsverwagting is daarom nie wêreldvermyding wat die aandag van die wêreld wegtrek nie, maar wêreldwyding en wêreldtoewyding wat aan die lewe heiliging, veredeling en heling toevoeg. Die voleinding het nie ‘n einde nie. Dit is oop – oneindig oop, daarom sodra dit gedefinieer is, sal dit elke keer ook weer geïnfinieer moet word (ontgrens, oopmaak). Die voleinding is ad infinitum.

5. Die sekondes van elke dag
Die toekomsverwagting en toekomshoop maak van die lewe nie net ‘n wagkamer nie, maar ook ‘n werkkamer. Die verwagting van die toekomshoop blom en kweek in die lewenstuin van die gelowige ‘n verskeidenheid kultivars van hoop. Die lewenspraktyk is nie maar net ‘n addendum met ‘n blindedermstatus of ‘n naskriffie nie. Die waarheid wat in Christus geopenbaar is, betoon sy krag en effektiwiteit in dade (Jak 2:17, Heb 12:14). Die voleinding gryp in op die etiek van die lewe.Daarom moet dit dreun en zoem in die werkswinkel van die lewe. Van ewige lewensbelang is die vraag na die sekondes van elke dag!

• Staan dit op die bladsye van my lewensboek geskrywe dat ek in Hom, die Skrywer van die Boek van die Lewe, glo?
• Staan dit op die bladsye van my lewensverhaal dat ek elke dag gelewe het vanuit die genade van die Here?
• Is dit in woorde en dade aangeteken in my lewensboek dat ek elke dag gelewe het in ‘n lewende verhouding met God my Vader?
• Staan dit geskrywe dat ek my laat lei het deur God die Heilige Gees? Seënwense vir die skryf van u outobiografie. Onthou elke dag: wat geskryf staan, is geskrywe. Onthou: God se môre begin in die sekondes van elke dag!